Top Stories

KNG TV

Asuya-KIO ginrun manghkang hparan masit hpung hpaw ai kawn majan nhpan yawm

Hpakan-Ginsi Lam kaw hkap sin nga ai Myen hpyendap shagyit

Wunpawng Mungdan Shanglawt Hpung (KIO) hte asuya lapran jawm myit hkrum let hpaw nhtan da ai Manghkang Hparan Masit Hpung gaw lahkawng maga majan nhpan shayawm na lam bawngban ngut ai hpang kasat gala lam 95 tsa lam shadang yawm mat ai nga Simsa Lam Akyu Galaw Hpung kawn Slg. Lamai Gum Ja tsun ai.

Shanhte a shata mi kalang galaw ai zuphpawng hpe KIO Machyoi Hpung Rapdaw (Technical Team) rung gawk hta September praw 5 ya shana maga hkying 3 kawn hkying 5 jan du hkra 6 lang ngu na hkrum shaga hpawng hta hpyen masa shayawm na lam hta sha n-ga nanghpam tsi mawan tsai wa lu hkra mung bawngban ai lam rai nga ai.

“Simsa lam de sa wa ai lam ntsa matut majan nhpan n nga hkra lahkawng maga bawngban ai, majan ram ram gaw yawm wa ai hpe mu lu ai. Dai majaw matut nna majan n byin na matu gara hku jawm gawn hkang sa wa na ngu ai lam ni hpe bawngban sa wa ai rai nga ai” nga Slg. Lamai Gum Ja tsun ai.

Jinghpaw Mungdaw asuya Mung Jarit Hkringmang Du Kaba Tan Awng woi awn ai dat kasa marai 5 hte KIO kawn Du Up Jum Maran Zau Tawng woi awn ai dat kasa marai 5 ni hkrum shaga bawngban ai rai nga ai.
 
Lai wa sai August shata laman asuya hte KIO lapran kasat gala lam n nga ai ngu na daram yawm mat nna 95 tsa lam shadang daram majan yawm mat ai re nga matut tsun ai.

KIO woi ningbaw nna nanghpam tsi mawan pat jasan ai masing hta mungshawa hte lata gindun let sa wa lu hkra bawngban ai nga matut tsun ai.

“Mungdan asuya kawn mungdan ting hta nanghpam tsi mawan pat jasan nga ai zawn KIO hku na mung amyu sha bungli langai hku na nanghpam pat jasan nga ai re. Ya gaw mungshawa mung lawm wa ai. Dai hpe shanhte mung myit dik n-gun lu ai lam nga ai. Dai zawn galaw ai lam ntsa tarawng tara hte n htan shai ai lam n nga hkra lit nga ai asuya hte lata gindun let chye na hkat ai hku na nanghpam tsi mawan hkoi san wa hkra galaw sa wa na lam ni mung bawngban ma ai” nga Slg. Lamai Gum Ja tsun ai.

Dai hpang ndai shata kawn Myen asuya hku na Hpakan lungseng maw bai hpaw na lam hpe KIO kawn pat shingdang ai lam ni nga ai nga, soi sam nga shiga brawng taw ai lam hte seng nna KIO hku na pat shingdang ai lam laga mi n nga ai ngu ai lam ni hpe mung bawngban shalawm ai nga matut tsun ai.

Lai wa sai 2013 ning October shata laman asuya Munghpawm Simsa Lam Hkrang Shapraw Komiti UPWC hte bawngban dawdan myit hkrum da ai hte maren ginrun yu reng hkrang shawng na daw hpe hkrang shapraw dat ai lam mung rai nga ai.

Lai wa sai May 28 ya shani KIO hte asuya marai 5 hpra shanglawm ai Manghkang Hparan Masit Hpung hpaw nhtan dat ai rai nna asuya maga Jinghapw Mungdaw, Jarit Hkringmang Du Up Jum. Tan Awng woi awn ai dat kasa marai 5 hte KIO ginjaw kawn Du Up Jum. Zau Tawng woi awn ai dat kasa marai 5 ni shanglawm ma ai.